政情：陳恒鑌讚巴籍實習生幫得手
雖然香港係國際大都會，但政黨請人做地區工作仍然以華人為主，請少數族裔少之又少。不過，立法會議員陳恒鑌（Ben）近期就請咗一位巴基斯坦籍、名為黃哈山嘅後生仔做實習生，幫佢處理地區上有關少數族裔嘅議題。阿Ben大讚哈山有活力之餘又夠醒目，有助佢了解更多區內巴基斯坦人嘅生活習慣，未來會做更多協助少數族裔嘅活動。
處理少數族裔議題
哈山話，佢已經幫阿Ben個黨做咗十幾年義工，喺上次立法會選舉認識阿Ben，覺得阿Ben好似一個好朋友咁值得信賴，加上佢有心服務區內同鄉，於是就決定喺阿Ben嘅葵青辦事處做實習生，處理地區上有關少數族裔嘅議題。佢將會協助舉辦青少年職員講座，以及組織一眾鄉親喺暑假期間參觀立法會，而暑假後佢會繼續讀書。
阿Ben話，好彩有哈山幫手，佢先至知道印巴裔居民嘅生活習慣，例如依家係伊斯蘭教嘅齋戒月，唔少印巴裔人喺日落之前都唔可以進食，所以佢哋都要改為夜晚落區喎。