政情：協會改名搣走「盛事」
盛事基金因為多筆糊塗帳搞到臭名遠播，盛事變醜事，事實上「盛事」呢兩個字已成為負資產，點解？就連分屬建制派嘅和富大埔足球隊會長李宗德女兒李美辰等人都避之則吉，佢哋專門負責舉辦足球盃賽嘅「體育盛事協會」組織，在早一、兩個月前靜靜雞改名搣走「盛事」兩個字，話佢哋唔係想同盛事基金劃清界線，避免令人以為足球盃賽未開波就搞到一鑊泡都無人信啦！
李美辰、專業人士協會主席陳建強等近十人，去年底成立「香港體育盛事協會」，計劃舉辦足球盃賽為慈善團體籌款，但正式舉辦時間一改再改，連六月巴西世界盃熱潮過埋都未開波。不過，據聞最新時間表終於初現，就係計劃九至十月舉行，而時間基本確定嘅同時，原來連負責舉辦足球賽嘅組織名都改埋。
變成「活力都會」
翻查公司註冊處資料，「體育盛事協會」早一、兩個月前正式改名為「活力都會協會」，據悉表面原因係組織名有「盛事」兩個字，令人以為同盛事基金有關，因此改名係避免產生更多誤會。
有知情人士私底下透露，實際原因係盛事基金搞到「盛事」兩個字成為負資產，相信短期內好難復原，為免盃賽未開波就招惹風波，因此決定改名，相信當初改名時都始料不及。
還記得盛事基金主席林健鋒等人早前疑「被放生」，無被立法會政府帳目委員會嚴詞批評，一度在政圈引起一陣騷動，正當各方以為林健鋒又可以過關之際，協會就針對性搣走「盛事」兩個字，呢個表態真係勝過千言萬語。睇怕即使林健鋒早前獲當局續任盛事基金主席，但佢任內盛事基金變醜事呢筆帳，相信都無咁快可以撇清關係。話時話，盛事基金淪落至此，當局係咪應該考慮摺埋佢好過呢？