中環出更：衝擊東北撥款 擺慰勞宴
今日係新界東北發展前期工程撥款獲通過「滿月」嘅日子，慢必尋日失驚無神喺社交網站上載大擦盆菜嘅相片，稱係「新界東北抗爭慰勞盆菜」喎！包括慢必在內嘅多名泛民主派議員發動「拉布」足足七星期，立法會大樓更遭示威者衝擊搞到滿目瘡痍，前期撥款先獲通過，臨尾仲連累財務委員會要「開快車」審議多個民生項目，仲有咩值得慰勞甚至慶功呢？
慢必話，呢餐盆菜稱唔上係慶功宴，相信係主人家有感抗爭終於告一段落，決定假古洞一間茶樓擺足十幾圍，慰勞有份支持抗爭、甚至落場衝擊嘅立法會嘅議員、社運界朋友及市民。眾人揚言下一道「戰線」將會係去城規會，反對整個發展項目。
筵開十幾圍 絕非「貧農」
除咗慢必外，幫手「拉布」嘅張超雄及唔肯頂替吳亮星任財委會主席嘅劉慧卿都山長水遠入古洞開餐；粉嶺北農村及居民聯席成員卓佳佳、古洞北發展關注組主席李肇華與人稱「財哥」嘅打鼓嶺坪輋保衛家園聯盟成員張貴財都係座上客。擺足十幾圍唔係小數目，相信請得起嘅至少唔係「貧農」，抑或係參加者各自科水呢？
卓妮