中環出更：林健鋒囝囝入波high到拗柴
香港菁英會一班年輕人尋日趁周末齊集土瓜灣一間另類「國際學校」，為該會主辦的家庭夥伴計劃助陣，包括主席梁宏正、常務副主席盧金榮（Wingco）等人都有捧場。卓妮見到立法會議員林健鋒的兒子林凱章（Victor）着住人字拖到場，定睛一看，佢嘅左腳用繃帶紮實晒，原來係早前踢波時不慎扭傷足踝。Victor諗起都心有餘悸，仲話以後都唔敢踢足球喎！
從小就熱愛足球嘅Victor話，大約三個星期前，當時世界盃足球賽正酣，佢一時技癢，約咗班波友踢波。期間佢狀態甚勇，踢入咗一球，欣喜若狂、高聲歡呼，結果樂極生悲，不小心扭傷隻腳。隨即急急去睇醫生，被診斷韌帶撕裂，足足有三個星期與拐杖為伍，近日先至可以自己行番。Victor講起件事，笑稱當時確係得意忘形，往後還有一段時間要做物理治療，可能要六至八星期才能康復，認真慘痛。
菁英會助新移民融入社會
Wingco係今次活動籌委會主席，佢太太及兩位寶貝女兒也到場支持。Wingco話，今次家庭夥伴計劃共有一百多個新來港家庭及香港家庭參加，希望透過配對及定期交流，幫助新來港家庭融入社會，化解矛盾及歧視。佢都響應成為參加家庭，希望兩個女兒學會分享及包容。
今年剛剛榮升父親的梁宏正就話，希望藉著活動展示菁英會關顧弱勢社群的一面。今次活動選擇於保良局陳維周夫人紀念學校舉行，皆因該校專門為新來港小朋友開辦適應課程，經過半年後的適應期即可以進入主流小學就讀。該校校長黃志揚話，學生除了內地來港的新移民之外，亦有不少來自其他國家，所以都幾國際化。
卓妮