內地早前有一部紀錄片叫《舌尖上的中國》，透過中華美食展現人生幸福滋味，因為頗受好評，一度成為熱話。可惜嘅係，當大家從光影世界回到現實國度，「舌尖上的中國」帶來嘅唔係幸福，而係恐慌，內地黑心食物氾濫成災，唔止地道食肆全面淪陷，依家連國際知名連鎖快餐店都失守，甚至走出國門震驚海外，搞到人心惶惶，問你服未。
件事係咁嘅，上海一間美資食品公司爆出驚人黑幕，被揭發將過期、發霉甚至發臭嘅肉類回收加工，製成半成品供應畀大型連鎖快餐店，涉及店舖包括麥當勞、肯德基、漢堡王、星巴克等等，簡直無處不在，防不勝防。更令人震驚嘅係，黑心肉製品唔止攻陷內地，仲首度衝出世界，日本麥當勞官網尋日承認，當地分店有兩成使用有關食品公司提供嘅麥樂雞原料，並於即日起停止銷售。大家話嘞，問題食品遍地開花，家陣連日本都中招，問題究竟嚴重到乜嘢地步，可想而知。
內地同日本都被黑心肉製品攻陷，香港能唔能夠守住防線呢？咁就難講咯，嗱，有網民踢爆，本港麥當勞出售嘅麥樂雞疑似由內地提供，擔心腐爛過期肉製品已經流入本港，一時間人人聞之色變，麥樂雞變成「勿樂雞」。醜聞經過一日發酵，本港麥當勞終於承認，有採用相關食品集團食材，但就話材料唔係來自上海廠房喎。
其實，無論過期肉製品有冇流入香港都好，內地黑心食物問題不斷惡化，香港遭池魚之殃，已經係不爭嘅事實。唔係咩，問題食品層出不窮，無論地溝油又好，瘦肉精又好，無論三聚氰胺又好，孔雀石綠又好，過去以地下工廠或土炮國貨為主，如今連標榜衞生安全嘅跨國連鎖快餐店都一併淪落，連出名乾淨企理嘅日本企業都不能幸免，香港點可能獨善其身？點可能唔令人擔心？最諷刺嘅係，今次出問題嘅食品公司隸屬美國集團，本來循規蹈矩，一嚟到中國就膽大妄為，喺外國唔敢做嘅勾當，喺內地為所欲為肆無忌憚。橘越淮而枳，美資食品公司良心過期發霉，唔止係內地黑心食品危機惡化嘅先兆，更加係中國神州人心腐化嘅證據！
講到尾，內地問題食品氾濫成災，皆因內地貪官多如繁星，官場腐敗不堪咯喎，腐爛過期肉製品咪應運而生囉。正所謂，皮之不存，毛將焉附，成個神州大地都黑心腐化，知名連鎖快餐店淪為黑心飯堂，根本係遲早之事，如果內地腐敗問題無法根治，神州大地遲早全境毒物，無一間食肆可以安心光顧，無一種食物可以安心進食，「舌尖上的中國」變成「滅絕中的中國」。
一句講晒啦，過期發霉嘅腐肉固然可怕，腐敗無良嘅人心更加可怕。好心內地當局快快鐵腕肅貪喇，好心港產官僚做吓嘢喇，如果唔係，中華民族遲早絕種，香港都保唔住嘅咋！