政府上星期二公布政改諮詢報告，報告主體連同十二萬多份意見書、民調等，大拿拿都有幾千頁紙，政府官員撰寫報告時都可能忙中有錯。有人就好眼利，見到報告附錄四，引述香港研究協會政改民調嘅時候，新聞稿引述政改民調，但係圖表就用咗預算案民調嘅結果，可以話係九唔搭八。
政府早幾日收到投訴，翻查後先知道「眼大睇過龍」，上載番正確嘅圖片，又寫返註腳，解釋附錄早前錯誤引用同一個機構、同一個時段嘅另一個調查結果。政府聯絡咗協會，核實正確民調結果，更新內容。
我哋聽聞，原來整單嘢係源於兩次「蝦碌」事件。當初協會遞交政改民調結果嘅時候，其實係畀錯咗預算案民調結果圖表，當局睇到之後，已經要求協會提供正確嘅民調結果。不過，當製作報告時，政府手頭上有兩份協會民調，官員就冇為意，結果將份錯嘅民調放咗入去附錄囉！