政情：港版米芝蓮試食要倒貼?
由香港五大飲食業商會聯手舉辦嘅《香港味之年賞》，早前敲鑼打鼓招募五十名神秘食客，為今年底出版嘅港版米芝蓮進行評選，以抗衡西方味蕾操控本土美食命脈。不過，聽聞件事進行得唔係好順利，至少有十位神秘食客中途退出計劃，事關香港地百物騰貴，由主辦機構提供每餐三百元餐費經常唔夠埋單，食客甚至要自付金牛補貼，計落條數都唔係咁着數，都係咪搞喇！
每餐三百港元津貼
有關計劃在今年三月推出以來，獲得市民極大回響，事關有三百多人報名做神秘食客，大會經過精挑細選揀咗五十人，每人透過抽籤被分派往十間食肆試味，每餐可獲三百港元津貼。
咪以為「神秘食客」有得免費嘗盡美食係超筍任務，查實香港地百物騰貴，三百元食吓平民點心就得，去到裝修有番咁上下水準嘅食肆，或已經係米芝蓮星級食肆用餐，動輒二、三千元找數，扣除三百元墊底費後，神秘食客隨時需出動自家「金牛」先可以行得出門口。
搞手之一嘅稻苗學會前主席黃傑龍透露，有十位食客因為對食得豪感到「好揦脷」，決定退出計劃，大會惟有邀請餘下四十位神秘食客頂上，即係每人食多幾間。諗返三個月前，有份發起活動嘅飲食界立法會議員張宇人及飲食界名人胡珠等人，雖然已經講到明今次係要搵「識食之人」，就算係平價菜式，都可以特色取勝。不過，無論幾識食到最後都要埋單找數，如果食完仲要貼錢，真係食都食得唔開心，所以有人退出係可以理解嘅。
拒絕任何食肆贊助
黃傑龍就話，大會為咗保持公信力，所以拒絕任何食肆贊助，只係自行籌得逾百萬元經費，點知到頭來遇到咁嘅問題，所以明年要再搵多啲開源方法，將補貼費用提高，否則想搵人試食都難。話時話，如果主辦機構因應唔同級數嘅食肆來提供唔同程度補貼金額，相信「神秘食客」一職嘅吸引力會更加大囉。