中環出更：出席率計錯 華峰星爺伸冤
我哋之前報道過，立法會資訊科技及廣播事務委員會（委員會）部分建制派委員出席率唔夠四成，但原來係秘書處資料出錯。委員會尋日開會，其中涉事嘅金融服務界張華峰及金融界吳亮星（星爺）紛紛「伸冤」，話自己出席率有八成以上，要求秘書澄清。委員會秘書就承認計錯數，以今個立法年度計算，張華峰同議員蔣麗芸（Ann）出席率都有八成八，吳亮星就有八成二。
秘書處稱資料未更新
星爺話，呢個委員會係最高資訊科技嘅一個委員會，唔明點解有資訊問題；而張華峰仲話自己好捧主席黃毓民場添。秘書話，同事會將所有數據入咗電腦系統，但唔知點解同事輸入嘅資料同出來嘅報告唔同，今次搵唔到原因喎。秘書處事後回覆，經調查後，出錯因相關議員出席率資料未及更新。
講開阿Ann，佢前日喺政制事務委員會講政改諮詢報告時，嫌「長毛」梁國雄個鳥籠遮住佢視線，擅自「充公」咗個鳥籠。唔知呢個舉動係咪搞到長毛一肚氣，長毛尋日趁資訊科技及廣播事務委員會開會，行到阿Ann座位前，扮想搶走阿Ann枱面部平板電腦，好似小朋友要報復咁，阿Ann就笑笑口話：「咁小器，攞你個鳥籠玩下啫！」
卓妮