「想我都好想好似中咗頭獎，有嘢唔使做，老細又吹我唔脹，日日等出糧，冇乜嘢需要緊張……」，大家咪以為淨係唱歌吖，現實當中真係有咁嘅事。呢，立法會議員流會多過食飯，日日等出糧，納稅人吹佢哋唔脹，簡直係天下第一筍工。
話口未完又嚟啦。立法會一個條例草案委員會原定尋日討論電子病歷互通系統，結果十五個委員中只有三個出席，正式係小貓三兩隻，由於唔夠最低法定人數而以流會收場。換句話講，今次已經係本立法年度最後一次會議，惟有等下個立法年度分解嘞。
話時話，立法會流會已經唔係新聞，市民見怪不怪咯，議員缺席嘅藉口嚟嚟去去三幅被，唔係賴塞車，就係賴唔知醒，或者分身不暇。咪睇班議員平日黨同伐異，勇於內鬥，講到蛇王咯喎，不知幾齊心，左中右各路人馬都有，個個唔執輸。鬼咩，尊貴議員最鍾意遊埠，每逢有外國考察團，佢哋有理冇理，一定踴躍報名，依家抖暑在即，套用一句舊小說嘅話，慌唔係個心已經飛咗去爪哇國咩。
真係諗極都唔明，市民出糧畀呢班政客，係叫佢哋開會議政同埋監察政府，唔係又食又拎周遊列國，點可以郁吓就玩失蹤，郁吓就遲到早退，如果係普通打工仔，早就炒魷魚啦。
所以話啫，成班議員不務正業，懶到出汁，唔怪得立法會畀人叫「垃圾會」喇。大家有眼見，政客為博出位，講粗口、拉布、掟嘢，一個比一個激進，一個比一個粗鄙，市民睇見都眼冤。唔知大家有冇發現，一到比較重要嘅會議，市民關注，傳媒雲集，議員例必使出渾身解數吸引眼球，但遇到好似尋日嗰啲少人關注嘅會議咯喎，仲唔關人個關，閃得就閃咩。
當年鄧伯伯講過，英國人做得到，中國人也能做到。可惜事實啱啱相反，港英年代嘅立法局從來未試過拉布、流會，回歸後就一蟹不如一蟹，鍾意拉布就拉布，鍾意流會就流會，立法會成個無掩雞籠咁，簡直烏煙瘴氣，亂象叢生。咪話功夫茶唔提醒吖，有議員拉布拉上癮，講到明下個會期再接再厲，將戰線擴大到「三堆一爐」同創科局等議題，係又拉，唔係又拉，跛腳政府一味捱打，究竟點樣維持管治，實在令人懷疑。
今日香港七國咁亂，最無辜最無奈嘅始終都係納稅人。政府無能，政客無良，納稅人供養呢班廢柴，直頭冤過竇娥喇！