立法會議員梁美芬去年開始已經質疑中學通識科太過政治化，仲成立咗「關注通識教育聯席會議」，要求教育局取消必答題部分。本來件事已經淡忘，點知近日佢同教協又再為呢個題目對罵。
事緣梁美芬近日接受內地官媒訪問，話好多通識科教師上堂經常提及內地人權同貪污問題，但對中國近十年嘅成就隻字不提，令到唔少年輕人對內地不懷好感，所以建議將通識科由必修轉為選修。
教協前日發聲明，話梁美芬言論錯誤百出，扭曲通識教育科嘅推行現況，刻意誤導市民，尤其係內地人士對通識科嘅理解。教協又質疑，梁美芬三番四次批評通識科，有理由質疑佢嘅動機係要打壓通識教育。
梁美芬尋日反駁，話文憑試放榜後，收到好多求助，希望當局檢討被稱為「死亡之卷」嘅中文科，以及稱為「命運之卷」嘅通識科教學方法。佢質疑「教協是甚麼團體？可以打壓批評通識科的言論？」佢認為對方係製造白色恐怖，對此表示強烈抗議，又話會安排家長同教協直接會面喎。