政情：激進四子嗌四線拉布

齊入「工務」 「人事」小組

人民力量嘅大舊同慢必尋日回顧過去一年議會工作，話相當滿意今年「拉布」成績，大舊形容今年超額完成，感到好自豪、驕傲兼有成就感，連小蠔灣廚餘處理廠都因為建制派突然倒戈而被迫中止待續，簡直係「奇妙旅程」喎！

不過，為確保「拉布」行動萬無一失，佢哋已經同長毛、Gary溝通好，下年度除咗繼續喺大會、財務委員會「拉布」外，連財委會轄下嘅工務小組委員會及人事編制小組委員會都係佢哋頭號目標。由於現時工務小組只得大舊同Gary坐陣，人事編制小組更只得長毛一個，為避免重蹈大舊六月想臨時加入人事編制小組被否決嘅覆轍，四子決定來年齊齊加入兩個小組委員會。

盧偉國田少料有排頭痕

據了解，盧偉國（WK）下年度有機會冧莊做工務小組主席，人事編制小組就有可能由田北俊（田少）從葉劉淑儀手上接棒任主席，假如「拉布」四子最終齊腳，睇怕WK同田少都有排頭痕喇！

對於「拉布」四子前幾日突然幫忙「開快車」加快審議積壓撥款申請，唔通想「放生」政府？大舊解釋係佢哋嘅策略，唔可以「攬炒」同政府攬住一齊死，凍結晒民生項目。根據財委會議程，公務員加薪、低收入家庭津貼等重要民生項目都排喺「三堆一爐」後面，點樣「拉布」之餘唔影響民生項目呢？大舊一個轉身踢個波畀政府，提醒政府大可以調前民生議程畀財委會審議，責任唔喺佢哋度喎！

不過，正如我哋之前所講，政府已經識得同「拉布」議員同歸於盡，到最後關頭都係成功逼佢哋支持爭議性議案，睇嚟「拉布」四子要再度吓點拆招至得喇！