開講有話，上樑不正下樑歪，前特首曾蔭權爵士同前廉政專員湯顯明淪為「絕代雙貪」，家陣仲逍遙法外，公務員嘅貪污問題不斷惡化又何足為奇。單係貪污投訴咋，每年數以千計，暴露嘅問題只係冰山一角嘅咋！
當局資料顯示，廉署舊年接獲涉及公務員嘅貪污投訴達八百零九宗，雖然較一二年嘅一千一百餘宗有所下降，但係數字依然驚人，反映政府部門嘅貪腐問題根深柢固。至於因貪污罪行而被檢控嘅個案，更加有回升趨勢添，人數有十五人之多，其中十一人被裁定罪名成立，較一二年上升超過兩成。貪污個案一宗也嫌多，何況依家多到十隻手指都數唔晒添，當局成日吹噓「香港勝在有ICAC」，根本係吹水唔抹嘴。
可圈可點嘅係，貪污投訴喺一○年至一二年期間年年上升，一三年卻驟然掉頭回落，而檢控個案啱啱相反，本來年年遞減嘅數字突然逆勢回升。點解會咁呢？其實原因不難理解，一二年貪曾、貪湯嘅貪腐醜聞陸續曝光，全城掀起反腐怒潮，風頭火勢，官場鼠輩暫時收斂，一啲都唔出奇。至於檢控個案出現先跌後升嘅怪現象，更加係有因可循，檢控放軟手腳，咪正正係貪湯治下廉署綱紀廢弛嘅有力註腳囉。
所以話，上樑不正下樑歪，呢句話真係冇講錯。貪曾貪湯貪婪成性，「前腐後繼」，公務員有樣學樣，點會唔貪風蔓延吖。尤其係呢兩隻官場碩鼠貪腐醜聞不絕，鐵證如山，至今依然逍遙法外，大魚大肉，仲唔成為腐敗公僕嘅傑出典範咩。難為當局仲好意思講，話會以預防、教育及制裁三管齊下，促進公務員廉正之風。計功夫茶話齋，如果當局再唔盡快將絕代雙貪繩之以法，以儆效尤，做乜都係嘥氣嘅咋。
講到呢度，功夫茶又要問候現任廉政專員白韞六。廉署調查貪曾已經超過兩年，調查貪湯亦已經有一年幾，究竟幾時至有結果呢？究竟幾時至有行動呢？眾所周知，絕代雙貪唔止貪腐，更加係無恥，早前立法會發表報告批評貪湯令廉署蒙羞，貪湯冇覺得羞家不特止，仲大言不慚話報告還佢一個清白，如果廉署繼續唔嗲唔吊，話唔定貪曾貪湯會登報紙向你哋致謝，到時睇廉署醜唔醜！
一句講晒，廉潔與法治係香港嘅核心價值，港人對腐敗零容忍，好比眼睛容不下一粒沙子。擒賊先擒王，當局如果真係有決心維護廉潔，公務員隊伍中嘅腐敗分子固然要全面打擊，而對貪曾貪湯呢類大老虎更加要鐵腕掃蕩，捉拿法辦，咁先至可以殺一儆百吖嘛！