政情：今日你上鏡：莫乃光聽CD唔IT
潮流興喺網上下載歌曲，無論係用MP3或者用手機聽，聽歌模式已經科技化。不過身為IT人嘅資訊科技界立法會議員莫乃光（Charles），就寧願買CD碟慢慢聽。早前有一日晚上大約八點，Charles一個人出現喺金鐘大型商場CD舖，見佢一邊揀，一邊聽電話，好快趣就揀咗幾隻七、八十年代抒情英文歌曲精選CD，然後畀錢離去。
Charles話，自己係懷舊嘅人，呢啲歌都係佢喺美國讀書時代嘅流行曲。佢自嘲雖然身在IT界，但係聽歌就唔IT，事關佢懶得在網上搵歌下載，簡簡單單買隻CD就有好多靚歌，唔使煩。Charles又話，享受將CD放入CD機播放嘅傳統聽歌模式喎！Charles咁鍾意聽抒情舊歌，難怪佢寧做溫和民主派，同激進民主派唔啱Key喇！