政情：田二少24小時內抱龍鳳孫
做人老豆，有咩開心得過抱孫呢？就係抱第二個孫囉！咁有咩開心得過抱兩個孫？咁一定係抱龍鳳孫喇！新民黨副主席田北辰（田二少）就犀利啦，廿四小時之內一次過實現晒兩個願望，呢啲咪叫喜事成雙囉。
長女三女先後誕B
田二少長女前日啱啱生咗個ＢＢ仔，首次升呢做公公嘅田二少已經開心到飛起，仲話孫仔特別乖，提早出世等阿爺可以有時間睇世盃決賽。點知隔十幾個鐘，三女即刻追生個ＢＢ女，田二少廿四小時抱龍鳳孫。
田二少嘅大佬田北俊早已兒孫滿堂，田二少曾經多次公開恨抱孫。好彩佢一口氣追番兩名乖孫，可以同大佬拉近距離。田二少仲話，今年係佢同太太結婚四十周年，一年內有咁多喜事，證明佢行緊運喎！