政情：中環出更：胡曉明有教無類 想識黃之鋒
學民思潮召集人黃之鋒近日忙於搵學校，前日佢仲大大聲話報讀咗城市大學副學士課程，不過轉頭佢又被發現去咗樹仁大學報讀社會科學系。城大校董會主席胡曉明（Herman）就話，如果黃之鋒真係入城大嘅話，佢哋會做到有教無類，仲話自己亦好有興趣識吓呢個年輕人喎！
黃拒回應是否報讀樹仁
近日中學文憑試放榜，黃之鋒嘅成績備受矚目。Herman話，佢都有留意黃之鋒報讀城大副學士課程，如果呢位「異類」做咗城大人，Herman話唔會特別應付，因為一間大學應該係有教無類，佢哋嘅責任係畀多啲機會學生，等佢哋有多方面嘅體驗，豐富佢哋嘅人生。佢自己亦都有興趣識吓呢個後生仔，雖然大家嘅政治理念未必一樣，但亦想多了解佢嘅諗法。
Herman又話，咁多年來接觸過好多年輕人，唔覺得黃之鋒特別例外，除非黃之鋒唔想，否則佢亦歡迎黃之鋒同佢溝通。卓妮問過黃之鋒係咪報讀樹仁大學，但係佢話忙於聽政改諮詢報告，唔想講呢啲嘢喎！
卓妮