政情：今日你上鏡：旗下Café重開 伍沾德巡場

政商界及娛樂名人聚腳嘅中環置地廣場餐廳Café Landmark，早兩個月暫停營業進行裝修，直至尋日重開，身為老闆嘅美心餐飲王國創辦人伍沾德都特別到現場巡視業務。尋日下午三點幾鐘，我哋見到坐住輪椅嘅伍沾德由一位男士推到置地商場二樓欄杆旁邊，然後望落一樓Café裝修後重開嘅情況。期間，有個經理拎埋個餐牌上去問佢意見，佢睇咗一陣，手指指好客氣咁對答咗幾句就離開喇。問伍沾德間Café係咪仲有嘢要跟進，佢就話只係嚟睇一睇啫，其他嘢好多都放手畀員工去做喎。