中環出更：港式滋味名人懷舊
民以食為天，好多人對飲食都非常講究，而隨着時代改變，飲食文化和從前大有不同，好多傳統懷舊食品已經失傳。香港歷史博物館名譽顧問鄭寶鴻話，以前廚師慢工出細貨，每間茶樓嘅點心都各有特色，煮個生炒糯米飯，真係一路灑水一路炒。依家事事講效率，乜都要快，點心款式千篇一律，歎茶嗰種閒情逸致亦不復見。
中華廚藝學院早前搵來一班飲食界老行尊，集結香港唔同年代飲食掌故，撰寫成《老港滋味》一書。當中歷史學者鄭寶鴻，對飲食亦有一番研究，仲清楚記得上世紀中上環著名食肆所在位置。佢話以前除咗「星期美點」外，每間茶樓都有自己風格嘅點心。以第一茶樓嘅「雞絲粉包」為例，用新鮮雞肉及蝦餃皮製，包成一個銀包咁款，好睇又好食。
鄭寶鴻又話，以前嘅雲吞麵，真係用大地魚及鮮蝦餚湯，依家就以味精取代，食唔番舊時嗰種味道。至於昔日成行成市嘅「大牌檔」，雖然依家搬晒上市政大廈，但佢話都有好處，衞生得嚟一樣可以有「鑊氣」，只係部分人覺得冇風味啫。
新光集團創辦人胡珠就慨嘆，食材除受西方影響外，以前季節性嘅食物，經基因改造後，一年四季都食到，但其屬性及食療價值就因此唔同咗。而環境污染亦令食物質素下降，同一種魚類都可能冇以前咁鮮味。另外，熊掌、娃娃魚等被禁食後更難再嘗到。
難忘傳統「鴨腳扎」
同場仲有米芝蓮「阿鴻小吃」師傅黎偉鴻，講起懷舊食品，做燒臘出身嘅佢就難忘「金錢雞」及燒味舖嘅「鴨腳扎」喇！不過，佢所講嘅呢種「鴨腳扎」同現時茶樓食到嗰種並唔一樣，佢形容，燒臘舖嘅「鴨腳扎」係由鴨掌包住一舊叉燒之類嘅肉類，再用鵝腸或雞腸紮實，以前好多地方都有得賣。不過，可能因為製作麻煩又需時，所以依家冇乜人整，而大家對「鴨腳扎」嘅印象就變成現今酒樓嘅大眾款式喇。
卓妮