巴德大戰facebook2億留言
巴德大戰全球矚目，當中喺社交網facebook嘅討論，更創下今屆決賽周新紀錄；根據佢哋嘅數據團隊統計，全球有6,600萬人作超過2億次交流，包括近況更新、評論同讚好。巴西係東道主，佢哋嘅賽事特別多人討論，到目前為止，巴西包辦晒前三名最多人討論場次，除今仗外，第二同第三名分別係對克羅地亞同智利。至於計最多人討論球員，就係德國嘅湯馬士梅拿，其次為巴西嘅大衞雷斯。
香港方面，當然唔少得香港德國足球之友嘅聚會，由劉舜文帶領超過40名志同道合德迷一齊捱眼瞓為愛隊打氣，德國大發神威，除咗搞到一班德迷叫到聲嘶力竭外，亦令佢哋精神大振，好多德迷原本諗住完場趕返屋企「瞌番陣」，最終都因為興奮得滯睡意全消，賽後依戀不去，跟住直踩上班全無睡意添！由於表現出色，香港德國足球之友已準備好決賽會刷新出席人數，物色緊可容更多球迷參與嘅場地！
