港產官僚成日吹水話法律面前人人平等，其實不公不義嘅事情日日發生，如果唔係，香港就唔會搞到烏煙瘴氣，民怨載道喇。所以咯喎，平機會準備補鑊檢討歧視條例，可以講係姍姍來遲，呢個政治花瓶一直無事生非，添煩添亂，依家先至亡羊補牢，遲唔遲啲吖！
件事係咁嘅，平機會展開為期三個月嘅歧視條例檢討公眾諮詢，計劃將現行有關性別、家庭崗位、種族及殘疾等四條歧視條例合併簡化，同時建議擴大或修訂部分歧視條例保障範圍。點解要檢討歧視法呢？平機會話喎，十八年來香港出現不少變遷，而目前反歧視法例有不足之處，市民喺性別、懷孕、殘疾等方面都面對歧視問題咁話。難為平機會仲好意思講出口，社會無法共融平等，正正就係因為佢哋失職，今次諮詢與其話係改善不足，不如話係認衰補鑊仲貼切喇。
即係咁，肯補鑊好過唔補鑊，為消除歧視展開檢討諮詢，乃應有之義，本來大家冇乜質疑，問題係，今次諮詢好明顯犯咗一個嚴重缺失，就係對條例漏洞視而不見，隨時又製造司法不公。喺現時千瘡百孔嘅歧視條例下，經常有人鑽司法程序空子，無事生非，郁吓就話歧視，郁吓就濫告無辜，唔止浪費公帑，更加對良好公民造成極大精神困擾同經濟損失，簡直荒謬。而更荒謬嘅係，明知有人濫告，平機會居然受理，而司法機構亦葫蘆僧亂判葫蘆案，即使濫告者被判敗訴，都唔會受到懲罰，以致一再出現無辜者贏官司輸堂費嘅怪事。你話嘞，濫告唔使成本，更唔使被罰，咁嘅條例公平咩？咁嘅制度公義咩？歧視條例漏洞百出，根本係當局帶頭歧視就真！
講嚟講去，禍源始終係平機會。呢個政治花瓶一向揸住雞毛當令箭，恃住一紙歧視條例，四處撩是鬥非，陷害良民，製造矛盾，添煩添亂。不過又難怪嘅，平機會出晒名烏煙瘴氣，醜聞多多，點會有好嘢吖，尤其係家陣由翻閹嘅「廢官」周一嶽負責，更加係七國咁亂。計功夫茶話齋，檢討歧視條例固然需要，但更需要嘅係檢討平機會本身。
咁喇，反正諮詢期有三個月，睇吓平機會有冇作為先，如果又係做騷，換湯不換藥，不如自動摺埋，無謂喺度篤眼篤鼻！