政情：高達斌向美芬偲嫣說不
「愛港之聲」召集人高達斌尋日獲邀出席電台節目，同「佔領中環」行動發起人戴耀廷、學聯秘書長周永康對壘，可惜大家最期待嘅激戰畫面未有出現，兩派各說各話、火花欠奉，反而「愛」字堆團體之間嘅明爭暗鬥仲好睇。隸屬愛字頭陣營嘅高達斌不但向立法會議員梁美芬建議嘅反佔中「志願軍」說不，連正義聯盟召集人李偲嫣下月搞嘅撐警遊行，高達斌都話唔使旨意有合作機會。
李偲嫣日前宣布成立「撐警大聯盟」，下月初再舉辦撐警遊行。高達斌話，一直支持警方執法，但即使同李偲嫣係「同路人」都免談合作喇！
稱李「好忌佢」 合作免談
佢解釋，李偲嫣一向好忌佢，擔心能力比唔上佢，大家一齊行動會被佢搶走晒啲曝光率；加上去年八月嘅旺角撐警集會，雙方就錢銀問題出現過爭執，所以高達斌索性好男不與女鬥，各自各開壇作法好過，難怪高達斌要喺今個星期日搶閘舉行撐警遊行嘞。