政情：楊章桂芝熊貓派街坊
全城掀起熊貓熱，新華旅遊董事總經理楊章桂芝（Cindy）都湊熱鬧，日前由四川運送1,599隻熊貓公仔到港，將免費派發予港人，宣揚保育訊息。原來呢批熊貓公仔係由四川省旅遊局送出，賀Cindy公司四十歲生日，Cindy收到呢份大禮都喜出望外，一於公諸同好派街坊。
抵港嘅熊貓公仔依家「棲身」喺Cindy嘅銅鑼灣公司，大小熊貓放滿每一角落，十足熊貓展館。待明日剪綵儀式後，1,599隻熊貓公仔就會派畀街坊，先到先得。灣仔區議員伍婉婷收到風，尋日率先上去一睹壯觀嘅「熊貓海」。
除咗派公仔外，Cindy同二女Jane又搞咗個數數熊貓比賽，只要登入facebook網頁競猜熊貓數目，兼畀個「讚好」嘅話，每收集一個「讚好」，佢哋會捐出四元畀世界自然基金會，推動環保教育。Cindy咁錫熊貓係有原因嘅，原來佢二十年前首次到訪四川臥龍大熊貓研究中心，近距離抱熊貓，結果一見鍾情。