立法會財務委員會主席吳亮星（星爺）之前主持新界東北發展前期規劃撥款審議時，引來唔少爭議，搞到最終議會內外都衝擊連連。啱啱出獄嘅議員「長毛」梁國雄，即刻就向星爺提出不信任動議，財委會今朝會召開特別會議處理動議。雖然建制派計人數就一定能否決動議，但佢哋似乎怕敵不過周公，一陣瞓晏咗搞到開會遲到就大件事喇！
聽聞有人會做人肉鬧鐘，為各建制派議員提供morning call服務，確保叫齊人開會否決長毛提出嘅不信任動議，但就唔知係打電話定WhatsApp通知喇。由於不信任動議係針對星爺，所以動議會由副主席劉慧卿處理，長毛同星爺會各自發言三分鐘，跟住交由其他議員發言，最後由兩人作一分鐘總結，之後就進行表決。
消息人士話，建制派怕泛民主派玩嘢，唔係怕佢哋衝出位搗亂，而係怕粒聲唔出突襲表決動議，當建制派唔夠人時，就殺佢哋一個措手不及。如果真係唔夠人咁點呢？建制派就會學泛民咁玩「拉布」拖延時間，拉到齊人投票為止。如果係咁，建制派就唔好再鬧泛民玩「拉布」喇。