政情：四圍辣火頭 廢鑊有陰謀
「翻閹」做平等機會委員會（平機會）主席嘅「廢官」食物及衞生局前局長周一嶽（周一鑊）又有新搞作，今次佢就借平機會前主席林煥光離任前話研究嘅《歧視條例》檢討公眾諮詢來四圍點火頭，又辣新移民、又辣個人遊，連性小眾人士同新界原居民都辣埋。唔單止咁，佢仲話要研究喺香港設立人權委員會添！眾所周知，周一鑊在任局長時已四圍「打毒針」，唔知佢今次係咪想借檢討擴權自立為王？抑或係有陰謀要反控政府呢？
抄橋研設人權委會
周一鑊尋日介紹由即日起為期三個月嘅《歧視條例》檢討公眾諮詢文件，主要係檢討將四條歧視條例，包括《種族歧視條例》、《性別歧視條例》、《殘疾歧視條例》同《家庭崗位歧視條例》合而為一，並確保本港法例能持續有效保障基本人權。其中喺《種族歧視條例》下，除保障膚色、種族外，係咪要探討國籍、新移民身份及居港年期都應受到保障；喺《性別歧視條例》下，除結婚、未婚等五個婚姻狀態，「事實婚姻」係咪應受保障。
此外，就改革平機會嘅職責同權力，連帶係咪應喺香港設立「人權委員會」問題都講得出，又問應否考慮改革或廢除《新界條例》同丁屋政策。上述一連串檢討，咪即係以後港府唔批准居港未滿七年嘅新移民申領公屋就涉歧視？保障「事實婚姻」咪即係為同性平權開先例？周一鑊話，香港嘅新移民福利制度有一定原則，如果係香港人就應該被一視同仁。至於點解要搞多個人權委員會出嚟呢？周一鑊就聲言係世界趨勢喎。
有前科曾打壓《東方》
其實我哋之前都講過平機會呢啲機構表面處理申訴，但事實係過往挑起更多官司同糾紛，同私隱專員公署一樣，都係末代港督「肥彭」彭定康製造出嚟打壓異己嘅產物。而周一鑊今次周圍點火頭亦唔係新鮮事，事關佢都有前科搞過東方報業集團，佢時任食物及衞生局局長時，就利用《不良醫藥廣告條例》針對及打壓過《東方》，今次佢利用平機會「借屍還魂」，又唔知有咩陰謀喇。不過，《東方》身經百戰，無論牛鬼蛇神點樣攻擊，我哋都唔會驚嘅！