魯迅筆下嘅孔乙己有句名言：「竊書不能算偷」，不過如果你問港產官僚咯喎，莫講話唔當偷書係一回事，就算盜取政府財物，佢哋一樣非常大方，完全唔當一回事嘅咋。
話說由路政署負責推展嘅港珠澳大橋工程，除咗進度嚴重滯後，近日更發生承建商喺官地偷沙嘅醜聞。大嶼山沙螺村村民早前目睹多名承建商工人，駕駛吊機喺俗稱「曱甴頭灣」嘅沙灘剷沙，裝入沙包袋後運回香港接線段地盤工作台。工人剷完又吊，吊完又剷，足足運走一百包沙，村民形容，每個沙包有如廿五公斤米袋咁大，沙灘即時出現一個大窟窿。光天化日之下，偷沙賊如此沙膽，問你服未。
由於沙灘係官地，沙粒屬於政府財產，事態嚴重，村民盡社會責任，拍照後即通知村長報警。好嘞，人證物證俱在，照計冇得抵賴，當局好應該「拉人封艇」，將責任人繩之以法喇。不過奇怪嘅係，當局遲遲冇行動，村民只見到有人隨後鬼鬼祟祟咁將沙粒送回沙灘，當冇事發生過一樣。
小偷被捉到正，物歸原主就當冇罪？講唔通喎。更荒唐嘅係，本報向路政署查詢，署方竟然振振有辭，一味幫承建商開脫責任，講到偷沙行為好似英雄咁，指係保護樁柱嘅臨時措施，又話事後已將所有海沙放回原地，過程中亦無對沙灘造成污染喎。至於承建商有否違反工程合約，係咪盜取政府財物，路政署隻字不提，成個小偷幫兇咁款。
有法不執，豈有此理！有立法會議員睇唔過眼，直指如果唔係村民報警，路政署肯定理都唔理，啲沙連放都唔使放番去，咁仲成世界嘅！環保團體亦話，就算承建商將沙粒放回原地，亦唔可以將受損沙灘完整復原，路政署有法不依，擔心人人有樣學樣，釀成環境大災難。而執業大律師係咁講嘅，除非獲政府授權，否則擅取官地物品，即屬違法，即使物歸原主，亦唔可以作為豁免起訴嘅理由。
仲有吖，建造業人士踢爆，本港河沙供應充足，就算要作緊急使用，亦可即時購買，根本毋須偷沙。所以話啫，路政署公然包庇，徇私枉法，唔係官商勾結都冇人信嘞！
講開又講，○三年本港曾發生承建商非法掘取東涌河大石事件，當時執法部門二話不說，即時對有關人等作出檢控。何解同類事情，當時係犯法，家陣又會冇事嘅呢？唔係雙重標準又係乜？唔通香港社會真係倒退成咁？
學孫中山先生話齋，「政治良否，視人與法」，香港自拆法治招牌，咪就係拜混帳官僚所賜囉！