政情：八網難逃：立會網站驚現「運房局司長」

回歸前香港班最高層決策官員，中文名稱大部分都好簡單咁叫做「政務司」、「財政司」、「保安司」、「公務員事務司」等，回歸後就分開咗「司」同「局」兩層，並全部改為叫做「政務司司長」、「財政司司長」、「保安局局長」、「公務員事務局局長」等，畫蛇添足。澳門回歸後就跟啲唔跟啲，將等同香港政策局嘅部門全部叫做「司」，負責高官名稱就叫「保安司司長」、「運輸工務司司長」等。不過，尋日香港立法會網頁有關本周三大會嘅議程，就將多名局長「升呢」咗做「司長」，包括「教育局司長」、「運輸及房屋局司長」（紅框示）等，好似將班香港高官澳門化咁，睇到人搲晒頭。直至我哋向立法會秘書處作出查詢，網頁先臨急臨忙改番啱。