政情：樓上冧紙皮石 鍾港武要封竇

富榮花園第九座高層外牆冧紙皮石，幸無人受傷。（朱先儒攝）

鍾港武指，富榮花園樓齡只有十多年，過往亦聽過有紙皮石剝落問題，但咁大規模、咁驚險嘅都係首次，佢會向管業處同有關部門跟進。佢又話，事發地點對面有間小學，平日中午該處有好多學生行過，好彩現時正值暑假，先至無人受傷。由於冧紙皮石位置甚高，估計要一段時間清理維修，佢間辦事處對出路面可能仲要封閉多一輪，不過佢強調安全第一，佢哋受影響都冇辦法。

• 紙皮石跌落候車處簷篷再反彈地面，部分碎石散落喺鍾港武議員辦事處（箭嘴示）門口。