政情：學民抗命 走精面
今年民陣七一遊行後，學民思潮同學聯「兵分兩路」預演佔中，分別包圍特首辦同埋佔領中環遮打道。最終警方將遮打道嘅示威者清場，五百一十一人被捕，當中約有八十五人係學生，唔少係學聯領導。但學民就因為只佔領特首辦行人路，冇佔據到附近馬路，至今都冇一位成員被捕。有被捕人士事後就質疑，學民喺七一遊行當日嘅籌款金額，係咁多個團體之中數一數二，最後竟可全身而退，予人「袋錢就叻、拉人冇份」嘅感覺。
僅佔領特首辦行人路
遊行中人話，學民當日籌款時，不停向遊行市民高呼自己會去「公民抗命」。佢哋最後籌得一百三十一萬元，僅比「佔領中環」秘書處少八萬元，成績喺各大政團或民間組織稱冠，相反主辦七一遊行嘅民陣，以及與學民一齊發動佔中預演嘅學聯，就只係分別只籌得四十三萬元同幾萬蚊，差天共地。
不過，到真正「埋牙」佔中時，學聯兌現承諾留守中環遮打道馬路，最終多名要員被警方抬走拘捕，包括秘書長周永康、副秘書長岑敖暉，以至各大專院校嘅學生會代表。相反，學民由於走咗去「佔領」特首辦，而且只佔行人路，不佔馬路，無人被警方拘捕，有人質疑「咁都算公民抗命？」，「大讚」學民唔單止籌錢叻，「走位」仲叻。
其實學民同學聯等其他抗爭組織，之前已爆過分歧同內訌。學民以盡量吸引更多市民參與為由，認為大部分遊行集會都應依例向警方申請。但學聯等組織就堅持《公安條例》中有關事先向警方申請嘅條文，本身就係一條「惡法」，佢哋不應依循，認為咁樣先叫「公民抗命」。
周庭：冇諗過與馬路分別
我哋問過學民發言人周庭，佢就話一早解釋咗，佢哋去特首辦，係希望向特區政府表達訴求，學聯就想留喺代表敏感地點嘅中環，向中央表達訴求，總之大家都係推動公民提名喎。佢又聲稱冇特別諗過佔行人路定馬路嘅分別，即使當晚佢哋冇佔馬路，警方亦有舉旗宣告佢哋正在非法集會，依家只係暫時未有人被捕。究竟今次係有人眼紅學民籌錢多，定係學民真係公民抗命得把口，讀者自行判斷喇！