中環出更：舊年腰斬 偲嫣又搞集會
「正義聯盟」召集人李偲嫣早前不滿警方同政府對抗反新界東北暴力示威不力，走咗去政府總部絕食，數日後即不適送院，最終被迫放棄。尋日佢又有新搞作，重返政總廣場宣布要成立一個「撐警大聯盟」，並喺下個月搞番個「撐警大遊行」，瞓身支持警方對佔中等違法行為嚴正執法，並順便紀念去年佢針對爆粗老師林慧思所搞嘅撐警集會一周年。
8˙3擬發動遊行
李偲嫣指出，去年八月四日喺旺角行人專區搞嘅撐警集會，遭到大批激進示威者衝擊、抹黑，早已預示香港暴力政治文化抬頭，理性、和平、守法等核心價值已被拋棄，語言同肢體暴力不斷升級，擔心香港遲早變成暴力城市，所以決定將每年嘅八月四日定為「撐警日」，並會組織廿幾個友好團體，組成撐警大聯盟，呼籲支持警隊嘅民間團體加入。
由於八月四日係星期一，唔係好適合搞遊行，佢哋決定提早一日喺八月三日搞遊行，行程包括灣仔警察總部，之後再舉行集會。李偲嫣去年搞嘅撐警集會，最後搞到一鑊泡被迫腰斬，現場有人被打，事後更有人被控，希望今次遊行集會唔會又搞成咁喇！
卓妮