歌仔都有得唱︰「追追趕趕，高高低低，驚險的程度叫畏高者昏迷」。呢，香港中小學學額一時僧多粥少，一時供過於求，叫人無所適從。學額太多，教師擔心殺校飯碗不保；太少咯喎，家長學生爭崩頭鬼咁閉翳，你話唔係激到昏迷咩。
即係咁，面對新學年中一適齡學童進一步減少，全港中學剩餘學額超過四千個，其中屯門區情況最嚴峻，餘額多達九百個，據聞該區有九間學校屬於開設三班中一或以下嘅「高危學校」，隨時面臨被殺危機。危機當前，學校為求自保，各出奇謀。有同區學校達成「君子協定」，拒收區內叩門生，有啲區就呼籲已收滿廿五人嘅學校停止收生。總而言之，有福同享，有生齊收，務求大家唔使執笠。
學校為免淪為刀下亡魂，大家寧願收少啲學生，都唔會互相「搶客」，講白啲，其實即係變相縮班，捱得一時得一時咁解。問題係，幾年後雙非學童升中，情況將會出現一百八十度逆轉，到時中學學額又會成為搶手貨。根據教育局數字推算，自一七/一八學年起，全港中一適齡學童人口將喺未來六個學年內，由「谷底」嘅四萬八千多人，大幅反彈增加四成四至近七萬人，十足十坐過山車咁，都咪話唔誇張。
嗱，大家仲記得今年小一派位幾大鑊啦。當局臨急抱佛腳，為雙非學童設立咗專用校網，預留部分北區學額畀佢哋，其餘就派去屯門、天水圍等地區，結果兩面不討好，唔衰攞嚟衰，雙非家長埋怨仔女被「流放」到冇雷公咁遠，有人更揚言告政府歧視；而本地家長就覺得雙非學童搶奪資源。亦有家長擔心學校擴班影響教學質素，搞到七國咁亂，天怒人怨。
咁都不特止。由於港府已經叫停雙非孕婦產子，跨境學童呢班「生力軍」 將會完成歷史任務。有教育團體估計，小一學額需求預計將喺一九/二○學年開始回落。到時擴班學校又將面臨「縮班殺校」危機，你話係咪一時「撐死」，一時又「餓死」吖。
所以話啫，學位忽多忽少，學校、家長同學生慘被玩殘，特衰政府絕對係罪魁禍首。唔係咩，當局開放雙非之後闊佬懶理、關人個關，遲遲冇掌握雙非兒童數字及回流傾向，更遑論調整學額，提供配套支援，唔亂象叢生至奇。
古人教落，思則有備，有備無患。咪話功夫茶唔提醒呀，雙非問題一環扣一環，牽一髮動全身，學額只係「甜品」，接踵而嚟嘅就業、住屋同醫療問題先至係「主菜」。唔該港產官僚及早因應，做好統籌，咪到時又揦手唔成勢，搞到一鑊泡呀！