政情：團體財爺官邸抗議 雷大雨小
財政司司長曾俊華早前借「長遠財政計劃工作小組」過橋，提出設立「未來基金」用以支付未來嘅基建開支，被社福界及勞工界批評為明益大財團同地產商，反建議用筆錢嚟推行全民退休保障。一個新成立嘅組織「民間長遠社會發展運動」，尋日就去咗財爺官邸外抗議。之不過呢個號稱由多達四十個民間團體發起嘅新組織，尋日總共只得近三十人現身抗議行動。
40團體「發起」 僅派約30人
「民間長遠社會發展運動」發起人就解釋，佢哋其實係由二十個團體發起，佢哋今次合共派咗約三十人參與抗議，冇團體「走數」，至於新聞稿上另外個二十個團體，原來只係聯署支持佢哋成立，所以尋日冇派人嚟示威。
示威者喺財爺官邸外上演街頭劇，諷刺財爺唔聽民意，亂搞未來基金但拒推全民退保。示威者又話，佢哋早喺四月已開始約見鬍鬚曾，但對方一直以公務繁忙為由推卻，所以今次先至搵上門抗議。