政情：總結馬季戰績 名人各有贏輸
馬季尋日煞科，多名活躍於馬場嘅名人，亦係時候總結吓今個馬季嘅眼光同成績。馬主蘇啟聲及太太仁濟主席蘇陳偉香，直言非常滿意佢哋馬匹喺今季嘅表現。香港馬主協會會長陳湛全就意猶未盡，嚟緊會同班朋友一齊去北海道繼續睇跑馬。馬會大董廖長江就對今季嘅投注成績唔太滿意，但輸咗就當做善事，一樣咁開心。
蘇陳偉香尋日拍住拖入沙田馬場睇煞科戰，問佢哋今季成績點樣，蘇太笑容滿臉面話幾滿意，嚟緊暑假冇馬跑，佢會同家人一齊去旅行，但目的地暫時仲未計劃好。至於自言今季成績麻麻嘅廖長江，喺馬季結束後會同家人去冰島玩。
陳湛全就透露，嚟緊暑假會去兩次日本，一次陪太太及小朋友去東京玩，另一次就會喺八月份同一班馬主協會嘅朋友，飛去北海道睇跑馬。
佢又話，本來馬來西亞檳城賽馬會今年一百五十周年，佢哋一早傾好咗，諗住搞番個香港馬主協會盃，點知後來發生咗馬航意外等一連串事件，最後取消咗場盃賽，先至決定改去北海道。