政情：白鴿截胡嗌七月佔中
港大法律系副教授戴耀廷提出透過「佔領中環」、公民抗命，迫使中央及特區政府就二○一六同一七年政改方案讓步，本來已經好激。但當前香港局勢係「沒有最激、只有更激」，繼學聯秘書長周永康發動搶閘於七一舉行佔中預演，並預告會喺八月底再度佔中後，連向來立場相對溫和、強調「和理非非」（和平、理性、非暴力、非粗口）嘅民主黨（白鴿黨），尋日亦「硬起來」，揚言最快會喺呢個月就「截胡」提早佔中，真係唔聲唔聲，嚇你一驚。
明晚特別大會商討
香港政壇近期興鬥激，包括由最初嘅立法會大會拉布，擴展為現時嘅全方位、無定向拉布；由以前嘅集體離場抗議，演變為依家嘅集體衝出座位包圍主席台示威；由最早嘅掟蕉掟公仔，變成近日嘅飛杯爆玻璃；以及由六二二電子公投，發展到可能再搞一次五區辭職公投等。
白鴿黨主席劉慧卿尋日出席一個論壇時，就突然自爆該黨最快會喺本月內、或最遲喺八月份提早佔中。卿姐指出，佔中運動唔係只搞一次，而係一波接一波嘅抗爭，由於港府將於本月內公布政改首階段諮詢報告，人大常委會亦預計會喺下月底就香港政改設下框架，如果到時中港政府既否決公民提名同政黨提名，又「一錘定音」攞出唔符合國際標準嘅普選方案，佢哋就算未必入到「四波」，都會入定「三波」！
卿姐又透露，白鴿黨百多名簽咗佔中意向書嘅黨員、議員同社區主任等，聽晚會召開特別黨內大會，商討提早佔中大計，之後佢哋會約見佔中三子同學聯等團體，傾下大家點樣配合。
自言尊重三子意願
有白鴿黨中人解釋，政府對佔中公投以至七一遊行都不為所動，上周五仲首次拘捕主辦七一遊行嘅民陣多名成員，畀人感覺係「撩打格」，所以該黨就喺早兩日決定召開有關會議，準備提早佔中。佢哋自言並非「鬥激」，亦無意截任何人嘅胡，最後點做同幾時做，都會尊重番佔中三子嘅意願。
佔中發起人之一陳健民就重申，依家仲未係佔中嘅成熟時機，但如果港府諮詢報告「發癲」，講到明冇公民提名，又或者人大常委會喺八月底作出強硬決定，堅持「機構提名」及「全票制」等，令香港選民冇可能有真正選擇，佔中屆時就可能一觸即發。