中環出更：示威者敢佔中唔敢見傳媒？
香港專上學生聯會（學聯）同學民思潮喺七一遊行後預演佔中，警方最終拘捕五百一十一名示威者，大部分遭警方發出警告信。學聯尋日特登為被捕者舉辦行動後續支援分享會，並發出採訪通知邀請各大傳媒機構採訪，不過佢哋喺分享會舉行前突改變初衷，決定將活動改為閉門進行，唔畀傳媒企分享會外影相，甚至出動保安要求傳媒離開，莫非示威者敢預演佔中唔敢見傳媒？
學聯搞分享會 公開變閉門
學聯呢個分享會原定下午二時許舉行，由開放予傳媒採訪改為閉門進行，底因係有人擔心警方會秋後算帳，但尋日現場所見，數十名出席分享會嘅市民，其實進出分享會都表現大方，未見特別避迴避鏡頭。
學聯前秘書長陳樹暉解釋，分享會閉門舉行嘅出發點，係希望保護當日被捕人士私隱，又話今日下午會召開記者會總結分享經驗，同時邀請願意受訪嘅示威者出席接受傳媒訪問。
查實傳媒當日喺警方清場拘捕行動時，已影過示威者樣貌，學聯今次以為免示威者擔心為由改為閉門進行分享會，呢個理由好似有啲牽強喎。
卓妮