中環出更：論壇混戰「短毛」食蕉
尋日香港電台節目《城市論壇》主講七一遊行同六二二公投，台上講者清一色都係泛民人士，台下嘅維園阿伯同親建制團體深感不公，於是向泛民抄橋，多次衝出座位包圍主持謝志峰同一眾泛民講者示威。雙方初則口角，繼而動武，已由「長毛變短毛」嘅社民連議員梁國雄用手篤一位女示威者塊面，對方就先後拍打咗佢最少兩下，期間「短毛」喺混亂中食蕉，市民睇到真係唔知好嬲定好笑。
「保衛香港運動」發起人傅振中尋日手持碌柚葉同狗公仔，與廿多名成員現身維園《城市論壇》主場，話要幫佢口中嘅「監躉」短毛「洗塵」，批評對方係「走狗漢奸」等。短毛就反轟傅振中「收錢」示威，而且「收廿萬、出廿個（人）」，有「走數」之嫌，激到班示威者紮紮跳。
與示威者動口又動手
期間一名女示威者抵唔住頸，走近短毛背後指罵佢。向來對女性好有風度嘅短毛，最後亦忍唔住用左手食指篤咗對方塊面一下，仲差啲插咗入呢位女示威者副眼鏡裏面，對方隨即出拳拍打咗短毛左肩一下，之後仲加多一拳。女示威者畀在場保安同警員拉走後，仲不斷指控短毛「打女人」同「非禮」。
混亂中，又有人效法短毛喺立法會嘅「掟嘢」技巧，而且掟得仲準過短毛，隻蕉啱啱好落正喺佢面前張枱，但又掟唔中任何人，警方想告佢普通襲擊都幾難。之前喺立法會表演過食狗餅同食紙嘅短毛，見狀立即「食得唔好嘥」，當眾剝皮食蕉，仲表現得津津有味添。
喺七國咁亂下，謝志峰最終要搵警方幫手維持秩序，先至避免到論壇首次被腰斬，短毛最後亦要喺警員護送下離開。
期間有女粉絲搵短毛合照，短毛即擺出親民微笑，同對住女示威者時個樣勁大對比。
卓妮