建制派至今已經成立林林總總嘅反佔中團體，可以話交足功課。但每逢反佔中團體有建議，似乎都係得啖笑。向來語出驚人嘅立法會議員梁美芬尋日又有令人噴飯嘅搞作，佢話睇見周二晚上大批學生同市民預演佔中，警方要花近五個鐘先清場，提議不如招募一隊反佔中志願軍，等警察可以專心工作喎。
梁美芬話，睇過當日清場片段，認為香港警隊同菲律賓等鄰近國家相比，已經好克制，但第日真正佔中時，擔心警員無暇處理呢啲示威場面，所以建議成立志願軍，由退休警員或市民組成，專責處理反佔中等示威。梁美芬竟然將香港同菲律賓比較，咁不如同非洲第三世界國家比，香港一定好威威喇！
除咗梁美芬，以反佔中「聞名」政壇嘅周融又再另起爐灶，同近四十個商會、團體成立「保普選、反佔中大聯盟」，頭炮係舉行為期一個月嘅網上簽名運動，市民只要支持普選及和平，反對暴力同佔中就可以加入聯署，就算未夠十八歲都唔拘，咁會唔會有水分呢？