政情：胡鬧一粒鐘 峰鴿玩謝區會
有「峰鴿」之稱嘅民主黨中西區區議員許智峰又玩嘢。尋日中西區議會文化康樂及社會事務委員開會，其中排喺最後一項嘅議程係峰鴿有份和議嘅「關注解放軍駐港部隊大廈設大字燈飾」，佢一開波就動議要求確保會議可以討論同表決到呢項議程，即刻被建制派議員群起攻之，話佢唔啱程序，剝奪其他議員權利云云。
黨友都唔幫拖
跟住就吵鬧不休，委員會主席陳捷貴多次宣布休會，又拉峰鴿埋一邊傾偈。最好笑係佢黨友粒聲都唔出，無人幫拖。其中，鄭麗琼仲好似阿媽勸仔咁，叫峰鴿開會先喇，但佢都唔聽教。最後陳捷貴惟有趕佢走，但佢又唔走喎，陳捷貴無奈宣布中止會議，結束歷時一個鐘嘅鬧劇。
無獨有偶，東區區議會亦上演霸王硬上弓。委任議員馮翠屏突提出支持「白皮書」動議，結果動議喺三十三名建制派贊成、五名泛民反對下獲得通過。公民黨三名區議員同唔關事嘅陳家洛、陳淑莊喺會前提出抗議，譴責建制派漠視民意，不過建制派當然懶理啦！