政情:授勳冇譜 中聯辦林鄭鬥卸

本報尋日獨家踢爆,今年啱啱出爐嘅太平紳士委任名單中,曾捲入廈門遠華特大走私案嘅全國僑聯常委姚志勝赫然榜上有名,令外界嘩然。政商界人士尋日就此議論紛紛,質疑點解去年出咗一個太平紳士華潤集團前董事長宋林後,今年又再出咗個姚志勝?究竟授勳制度出咗咩問題呢?如果咁離譜都得,咁「賊王」葉繼歡、清朝廣東著名海盜張保仔,甚至乎宋朝奸臣秦檜都可以攞勳章啦!

據可靠消息話,今次係中聯辦某位高人向特區政府推介姚志勝,尋日姚志勝獲委任為太平紳士一事被本報公開後,據悉中聯辦內部亂成一團,有人決定打死唔認,話授勳係特區政府嘅工作,一個唔該就將個波踢番畀港府。聽聞呢位高人近期強勢插手授勳工作,唔少求名求官人士透過各種手段討好有關人士,利益交換傳言滿天飛,連愛國陣營都媽聲四起,質疑呢啲人係咪唔放國家打貪行動在眼內呢?

有錢使得鬼推磨

按規定,由政務司司長林鄭月娥擔任主席嘅「授勳及非官守太平紳士遴選委員會」,負責考慮非官守太平紳士嘅提名,並向行政長官作出推薦。不過,政壇中人都知,中聯辦多年來干預授勳工作,經常向特區政府提交推薦名單,早已係公開秘密。不過,呢個情況有變本加厲之勢,事關大量內地人士成為太平紳士,據聞林鄭亦對人表示無奈。

港府面對中聯辦干預授勳,硬唔起來,連建制派人士都睇唔過眼。今次又再踩中地雷,連捲入走私案嘅人都可以搖身一變成為太平紳士,更加佛都有火。有愛國陣營人士怒不可遏話:「依家做人使咩有原則,有錢搵中聯辦咪得囉!」仲謔稱,有錢就可以換取勳銜,仲可以洗底添,真係有錢使得鬼推磨。

成利益交換工具

聽聞有另一位身家唔清白嘅人士,原本亦名列今次中聯辦推薦授勳名單之列,不過有人向港府把關人提水,臨門一腳先至阻截此人授勳,如果唔係,可能又係一宗大醜聞囉!話時話,頒授勳章及獎狀原本係要表揚對香港有重要貢獻嘅人,但依家就變成利益交換工具,紳士唔再係紳士,咁算係乜嘢呢?

第一手消息請下載on.cc東網iPhone/iPad/Android/Windows Phone Apps