「《我的媽媽》呢齣話劇係講緊我媽媽嘅故事，因為我未能夠喺媽媽生前好好照顧佢，所以一直都好內疚！」在阿明的眼中，母親林鳳堯是一位堅強的女人，在新界元朗以務農維生，養活了包括阿明在內的五兄弟姊妹。「到佢晚年入住老人院，有時照顧佢都覺得幾辛苦，我怪責自己冇做得更加好，依家諗番起都好內疚！」

分享經歷 紓解心中鬱結

自從母親於○八年逝世後，阿明一直將這鬱結埋藏於心裏，直至○九年加入由香港國際社會服務社天水圍（北）綜合家庭服務中心主辦的「四月天劇社」，有導師教授中心內的婦女、中年漢以至長者演戲技巧，更鼓勵他們把自身經歷融入表演當中，「當初加入劇社，志在乜都學吓，話劇以前未玩過，好想試！」

「四月天劇社」的一班演員都是以「師奶」和中年人為主。

阿明（右二）在台上演回昔日的自己，訴說與母親的相處點滴。

阿明目前正領取綜援，獨力撫養兩名女兒，雖然生活未盡如人意，但只要站上舞台，她就會變成魅力十足的女主角，令台下觀眾無不入神聆聽她說故事。「劇社嘅阿Sir上堂好多互動，透過唔同遊戲啟發我哋做戲同講對白嘅技巧，愈玩愈有興趣！」然而，要把一些傷心的回憶搬上舞台，對阿明來說是個挑戰，「分享自己嘅經歷好需要勇氣，初初講出嚟時，對住阿Sir喊咗好多次，但係演咗出嚟成個人會釋懷咗，感覺冇咁沉重。」

台下的小學生觀眾反應熱烈。

志洛（左）和柏榮對話劇印象深刻。

當劇友故事配角增感情

天水圍的文化設施不多，劇社在區內免費巡迴表演，令甚少出市區的區內居民接觸藝術，更成為演出者和觀眾的心靈雞湯。阿明的兩位寶貝女也曾觀賞過媽媽演戲，她坦言演戲令母女感情更深厚，「兩個女都支持我做戲，細女仲會不時畀意見我，例如話我講嘢太細聲。我記得佢第一次睇我講自己故事嘅時候，一路睇一路喊，家姐雖然冇喊，但都會感受到佢哋婆婆嗰份偉大。」另一邊廂，阿明同時也為劇社其他成員的故事充當配角，「了解咗人哋嘅故事之後，會對佢個人更加認識，好似多咗幾年感情咁。」

小學生感受母愛偉大

看一眾同樣住在天水圍的叔叔和姨姨在台上做戲，對台下的小學生來說特別有親切感，現場反應非常熱烈。有小學生坦言，原來從前的生活如此艱苦，以後都要好好讀書及孝順父母！

「我覺得阿明嘅媽媽真係好叻，因為要一手湊大咁多個仔女真係唔容易，丈夫又好早過咗身，做咗唯一嘅家庭支柱。」就讀小六的柏榮表示，看完話劇後，想到父母照顧自己的辛勞，日後會「唔好成日激佢哋」。

同樣讀小六的志洛對阿明的故事印象深刻，而且一眾演員的演技能讓人投入故事，「睇完之後，覺得母親真係好偉大，我哋應該好好孝順佢哋。我都想同阿明姨姨講，以前啲唔開心嘅嘢過咗去，希望佢日後可以快快樂樂咁生活。」

圖：崔祖佑／文：林偉軒

提名熱線:3600 9999

Fax:3600 9900

E-mail:like@on.cc