文化保育係世界潮流，各地「申遺」爭先恐後，有啲國家甚至博大霧，將人哋嘅傳統據為己有添，例如南韓咁吖，將端午祭申遺，中國文化變成韓國文化。其實，香港都有唔少具特色嘅傳統文化，可惜港府不聞不問，任由自生自滅，唔少傳統文化瀕臨「絕後」，簡直係暴殄天物。
當局近日公布本港首份非物質文化遺產清單，涵蓋四百個項目，證明香港呢個現代化大都市，保留咗唔少中國傳統及本地文化。好似漁民嘆歌咁吖，每逢水上人出嫁或喪禮時，都會由女方親屬詠嘆，由於第一句好似嘆氣，因而得名，歌詞可以反映當年香港漁村嘅生活面貌。又例如手雕麻雀，單係筒子、索子就要用唔同雕刻刀，刀路亦有不同，十足十古書法咁，幾精緻。
既然有咁珍貴嘅傳統，係咪應該好好保留，發揚光大呢？事實啱啱相反，好多傳統工藝唔係後繼無人，就係冇人識欣賞。好似上面提到嘅嘆歌，識唱嘅人買少見少，歌詞亦逐漸失傳；至於手雕麻雀師傅更加剩番三個咁大把。有牙雕大師反映，喺香港發展困難，反而作品多次喺內地同外國揚威，牆內開花牆外香，都咪話唔諷刺。
點解傳統工藝面臨絕境？之唔係港府保育後知後覺，講多過做囉。本港○八年制訂首份非遺名單，醞釀六年至正式出爐，反觀內地，○六年已經公布五百幾項國家級非遺；至於日韓，更加係領先香港半個世紀，佢哋早喺五、六十年代已設立「無形文化財產」，仲有文化遺產保育嘅專屬法例添。
港府公布非遺名單，係就係慢幾拍，本來遲到好過無到，最弊港產官僚敷衍了事，交咗差就算數。最好笑嘅係，幾年前發生景賢里事件，當局事後亡羊補牢，一口氣將一千四百幾項物業列為歷史建築，但既冇賠償細則，亦冇發展指引，更冇長遠方向，搞到業主怨聲載道不特止，最後連山頂道何東花園亦保唔住，被一拆了之。
正所謂，禮失求諸野，長洲太平清醮、大坑舞火龍等傳統節慶搞得有聲有色，可見民間保育做得仲好過政府。有麝自然香，呢啲傳統活動吸引唔少捧場客，正正係民間團體堅持嘅結果，如果靠港府咯喎，可能早就消失囉。
不妨打個譬喻，有人想大宴親朋，點知淨係得個食譜，食材欠奉，結果盞食西北風咋。文化保育亦係一樣，當局公布非遺名單只係第一步，仲要配合具體政策同目標至得。時間唔等人，傳統技藝又好，歷史建築都好，等到灰飛湮滅至嚟補救，咁就太遲喇！