政情：今日你上鏡：鄭承隆被「跣」揸拐杖
尋日沙田馬場有賽事，我哋見到仁濟醫院前主席鄭承隆（Edwin）揸住拐杖，步履蹣跚咁入場，好少公開露面嘅Edwin媽咪就傍住佢。究竟佢係點整親o架？Edwin話，約半個月前，佢喺一間餐廳用膳，咁啱清潔工人用水拖地，佢未有察覺地板濕滑，結果一跣一扭，左腳即告拗柴。問佢邊間餐廳咁靠害，佢就話無謂提喇。
我哋見佢有講有笑，睇嚟情況唔係好差，佢笑笑口話，其實好得七七八八，但係醫生擔心佢「重量級」身軀對膝頭有壓力，所以先至揸住拐杖，查實對生活起居已冇乜大礙。好似尋日佢有份嘅團體馬出賽，佢都同媽咪入場打氣，之後仲要出席禁毒活動。七一當日更要撐住支拐杖去遊行，事關佢係監警會宣傳及意見調查委員會主席，所以要親身監場咁話。