政情：七‧一按兵 八月才佔中
由「佔領中環」行動發起嘅「六二二公投」，聲稱至今已有超過七十萬人投票，再加上國務院「一國兩制」白皮書提出「司法愛國論」，引發上千名法律界人士上街靜默遊行，以及立法會財務委員會強行通過新界東北前期撥款等「利好因素」，大家實以為泛民會借啲意鼓動更多市民於七一上街，並喺遊行結束後進行佔中預演。不過消息人士話，以佔中三子同「搞事四人幫」為首嘅所謂主流泛民，七一唔會發起提早佔中，八月份先至發動新攻勢。
俗語有云，有風就要使盡，泛民忽然收工，係基於策略性同時間上嘅考慮。雖然白皮書引發極大爭議，但始終與有法律效力嘅人大釋法或政改方案唔同。而且中央喺發表白皮書後亦冇實際收權行動，「五十年不變」繼續淪為「五十年不管」，或者係想管但冇能力管。單靠呢份純屬吹水嘅白皮書，七一佔中好難轉化為足以同中央拗手瓜嘅政治籌碼。
較具成本效益
按政改時間表，特區政府將喺七一後先向中央提交一六年立法會選舉同一七年特首選舉嘅諮詢報告，啟動政改五部曲第一步。人大常委會就預計喺八月下旬嘅例會上，就兩個選舉辦法是否修改作出決定。泛民盤算到時先發動佔中，較具成本效益。
此外，我哋日前獨家報道過，「搞事四人幫」之首壹傳媒黎智英，喺佔中公投人數聲稱突破七十萬後，與佔中發起人戴耀廷、民主黨前主席「AV仁」何俊仁等泛民要員，雲集「李漢奸」民主黨創黨主席李柱銘嘅律師樓進行中期檢討。據聞會上其中一個結論就係佔中公投同七一佔中都應該暫時收手，一來若果佔中公投人數繼續大幅上升，可信性將被進一步質疑；二來若果七一佔中預演出亂子，爆發大規模暴力流血衝突，影響市民返工或令港股暴跌，民意可能會轉向，不利八月底嘅正牌佔中大計。
證諸戴耀廷事後澄清冇計劃提早佔中，即可窺知一二。近期佔中公投嘅宣傳攻勢亦明顯放緩，部分泛民政團想開多幾個票站，令公投遍地開花，結果都被佔中秘書處同港大民調以人手不足為由勸阻。之不過，多個激進泛民組織已表明會喺七一預演佔中，最後會否搞垮主流泛民嘅策略，大家拭目以待喇！