中環出更：模擬立會辯論 學生激過議員
尋日立法會終於休戰，仲趁機招呼一班中學生出席模擬立法會活動。立法會主席曾鈺成一開波就自嘲，近期嘅立法會都唔知有幾多嘢值得參與活動嘅中學生模擬。但話口未完，學生哥表現竟然激過議員，唔止大部份學生都舉手表示覺得拉布係正確，提問時用詞仲相當尖銳，連平時牙尖嘴利嘅議員都被考起。
東北議題成焦點
尋日出席嘅議員包括李慧琼（Starry）、劉慧卿及鍾國斌（Felix）等人，眾人即場模擬辯論兼回答學生問題。近日熱爆嘅新界東北發展議題成為焦點，有反對政策嘅學生質問Starry，如果政策係剝削市民，係咪喺立法會撳個掣就可以將人送上刑台、推人去死；又有學生質疑卿姐成日話泛民喺議會係弱勢團體，唔拉布點先迫到政府聽市民聲音；仲有反對功能組別嘅學生哥直斥功能組別「嘔心」，問本身屬紡織及製衣界嘅Felix係咪自己個人利益凌駕公眾利益之上喎，真係句句到肉。
卿姐就話，政府唔係樣樣政策都咁差，Starry就叫大家咪當佢係魔鬼或政府幫兇。而Felix就辯稱自己都係選出來嘅，啲票數仲多過特首喎！
卓妮