中環出更：教育子女 名人講心得
香港政治氣候變得愈來愈激，加上網絡影響力強大，令城中父母對子女管教漸生無力感。尋日一眾名人出席商務及經濟發展局前局長馬時亨（肥亨）大女馬露明旗下學校畢業禮時，講起仔女教育經，各有各妙計。財政司前司長梁錦松太太伏明霞為咗保護子女免受網絡欺凌，索性將部電腦放喺客廳，方便留意小朋友上緊咩網站，認真用心良苦。
伏明霞話，做媽咪嘅對於子女所有事都會擔心，佢趁依家子女仲細嘅時候管束多啲，例如將部電腦放喺廳度。不過長遠睇始終管唔到咁多，所以最重要都係自細灌輸正確嘅德育同人生價值觀。
梁乃江覺得年輕人太過自我
早前演藝學院畢業禮，有畢業生向主禮嘅政府高官高舉「官逼民反」標語，又做出交叉手勢抗議，行為十分出位。演藝學院校董會前主席梁乃江就話，好彩佢在任時冇發生過咁嘅事，始終畢業禮係人生大事，係莊重嘅場合，應該要尊重啲。不過可能時代唔同咗，年輕人太自我，唔單止演藝嘅學生係咁，其他大專院校都有類似事情發生，相信隨着年紀愈嚟愈大，有唔同人生經歷後，睇法會改變。
馬時亨太太：講聖經教做人
肥亨太太馬王培琪亦講到教女心得，佢話如果凡事都講「媽咪話」，就會好老土，身為基督教徒嘅佢會借助聖經，灌輸囡囡做人要善良，唔好害人嘅道理，咁就事半功倍咁話。馬太仲話，聆聽小朋友講吓佢哋嘅理想同夢想，再盡力去成全都好重要，但就千萬唔可以認同小朋友嘅「妄想」，幫佢哋做啲無可能實現嘅事喎。
卓妮