巴西夠運入8強
今日凌晨世盃16強揭開戰幔，主辦國巴西率先登場，但面對「私房菜」智利的頑抗陷於苦戰，加上尼馬被對手嚴密防守，全場表現冇料到，結果90分鐘雙方打成1比1，需要加時續戰，好彩「森巴兵團」認真有運，最終在互射12碼階段以3比2勝出，延續之前於世盃決賽周必勝智利的佳績。
東道主巴西今仗精銳盡出，尼馬、侯克、費特續於前線搏殺，智利中場發電機維達爾亦趕及復出。開波初段「變形俠醫」侯克殺入禁區遭對方伊斯拿撞跌，但英籍球證韋比冇吹罰12碼，其後侯克再施重炮罰球被救出。去到18分鐘，頻頻被智利球員侵犯的尼馬開出角球，隊長堤亞高施華頭槌撐後，其中堅拍檔大衞雷斯近門左腳一彈破網，為巴西打開紀錄；可惜32分鐘侯克於後場左路被智利的伊度亞度華加斯截到皮球，再妙傳入楔的智利翼鋒阿歷斯山齊士追成1比1。
侯克犯手球食詐胡
易邊後巴西繼續壓住對手來攻，中場悍將費蘭甸奴遠射斜出，55分鐘侯克於禁區心口一控射遠柱入網，但球證韋比認為他用手控波，食鋪詐胡兼被罰黃牌，認真冤枉。63分鐘巴西主帥史高拉利以祖奧入替表現平平的費特，加強進攻威力，74分鐘侯克於左路狂爆傳中，可惜搶點的祖奧卻來遲半步，81分鐘祖奧回傳侯克右腳狂轟，眼見必入之際，又被智利門神哥迪奧巴禾飛身撲出。尾段智利派出前鋒賓利拿代替維達爾，似係想於末段放手一搏，但法定時間依然打成1比1未分勝負。
加時上半場巴西出現體力不繼迹象，進攻氣勢明顯放緩，奧斯卡杜斯山度士及侯克的埋門亦遭神勇的哥迪奧巴禾沒收。智利又唔急於入波，令比賽陷入膠着狀態，加時下半場史高拉利再換入韋利安，但都無法打破僵局，智利亦有賓利拿射中楣，惟有以互射12碼分高下，最終巴西以3比2勝出。