貪曾治港，口號多多，乜嘢十大建設、六大產業，一個比一個動聽，可惜大部分都係大隻講，吹水唔抹嘴。不過咁，凡事都有例外，「教育產業」就講到做到嘞！
唔係功夫茶亂噏o架。城市大學最近計劃「賣盤」，轉讓屬下提供自資副學士嘅專上學院，據講已經搵到潛在買家喎。雖然校方解釋，咁做係為咗協助學院擴展，以及研究開辦學士學位嘅可行性，又拍晒心口保證現有課程、學位同學費將維持不變。可惜，學生就唔係咁睇嘞，唔少人加入網上反對群組，部分人更揚言圍堵校長室甚至佔領校園添。
又難怪學生群情洶湧嘅。正所謂嫁出去嘅女，潑出去嘅水，校方依家梗係可以下巴輕輕，乜都應承啦，之但係如果第時課程質素真係大插水，影響學歷認受性，校方就話關人個關啫，到時學生向邊個追究吖？學生淪為人球，呼之即來，揮之即去，唔嬲就假！
即係咁，私人企業追求盈利最大化，善價而沽就話無可厚非啫，但學校係作育英才嘅地方，教育係長遠投資，點可以當成低買高賣嘅生意o架。學校將教育當成一門生意，講得好聽啲叫唯利是圖，講得難聽啲根本就係誤人子弟。
話時話，副學士問題多多，亂象叢生，早就備受非議。港府好大喜功，拋出六成學生升讀專上課程嘅目標，為咗做靚盤數，製造「人人有書讀」嘅假象，對開辦副學士嘅申請無任歡迎，搞到大專院校爭住開設有關課程，形成一門龐大生意。就以城大專上學院為例，據講資產多達八億元，而且每年有盈餘，都咪話唔驚人。本來呢，入唔到大學嘅學生，修讀副學士不失為一條出路，弊在當局對副學士課程無監無管，放任自流，搞到泥沙俱下，課程未通過資歷評審有之，院校超額收生有之，五花八門，無奇不有。最慘係副學士認受性低，銜接學位又唔夠，學生畢業後升學無門，唔少人搵唔到工之餘仲欠落周身債，難怪有人將副學士譏為「掘頭進士」。所以話啫，學校誤人子弟，特衰政府絕對係始作俑者。
老實講，香港教育愈來愈商品化、銅臭化，副學士問題只係縮影咋。呢，有大學將宿舍租畀外人牟利，而名牌中小學就紛紛轉直資，大搞貴族教育，甚至連幼稚園都以貴租搶校舍。今時今日，教育全線向錢看，再咁落去，遲早變成學校大門八字開，有才無錢莫進來。
孟子當年講過，君子其中一大樂事，係得天下英才而教育之。可惜今時唔同往日，十年樹木、百年樹人嘅教育，被當成財源滾滾嘅生意，學生淪為搖錢樹，你話係咪悲哀吖！