政情：公民講場：唔使起「三跑」？超英獻拙橋

機場興建第三條跑道的環評報告正諮詢市民意見，天文台前台長林超英（黑英）尋日就表明反對興建新跑道。為了證明現時機場跑道使用量未飽和，黑英竟然就連航空公司嘅商業營運策略都諗埋，建議唔好採用小型客機，改用大型客機升降，就可以應付將來新增載客量嘅問題，仲話預計未來數十年都唔使興建新跑道喎。如果諗得咁簡單，航空公司就唔使用咁多錢請班管理層去做營運管理啦，況且唔係每個地方都適合用大型客機，更加唔係每程航班都有咁多乘客量。