政情：公記斷層 讓路新民?
新民黨同沙田政團公民力量（公記）結盟已有半年時間，雙方嘅如意算盤係想借助對方一臂之力，在立法會新界東直選取一席位，但到頭來原來搵人出選都好艱難。我哋早前講過，公記想派自己人出選，但原來新民黨都有同一願望，但可惜公記入面未有一位可靠贏得議席嘅人選，令佢哋依舊前路茫茫！公記出現斷層，蜀中無大將，最終好可能將參選機會拱手讓畀新民黨。
派人主導權在公記
有新民黨中人透露，即使該黨同公記結盟，但派人參選嘅主導權其實喺公記一方，只可惜公記咁多區議員之中，有啲年紀大嘅，但形象唔出位，賣相又欠奉，而年輕嘅一批就雖有幹勁又醒目，但始終形象唔夠突出，太新喎，即使勉強在老或嫩嘅區議員之中搵個人出選，亦可能不服對方。咁係咪暗示新民黨要空降黨員出選新界東呢？據聞該黨要搵位有專業形象嘅人空降參選唔難，但係咪贏到就好難講喇。
再者，雖然公記地區實力強勁，但區議會票源係咪能夠轉化成立法會票源呢？公記最終又會否過票畀民建聯或工聯會呢？以今屆選舉為例，雖然沙田區議員龐愛蘭掛住公記招牌參選，但佢只係取得二萬三千多票，但相比○八年選舉以獨立身份出戰，已取得二萬多票，換句話公記只係過咗三千幾票畀佢，所以如果新民黨一心諗住同公記結盟後有批樁腳打底，咁就真係要諗清楚喇。
一係要贏 一係唔選
至於公記本身又點睇呢？有公記中人話，如果真係再參選嘅話，就只許成功不許失敗，因為上屆幫過龐愛蘭助選，但成績一般，如果再輸多屆，公記就可能永不超生喎。所以公記只有兩個選擇，一係唔選，一係派位有十足把握嘅人參選，如果到最後一刻都搵唔到一位明星級人馬出選，就算係新民黨搵人空降新界東參選，佢哋都冇所謂喎。其實講到底，公記加盟新民黨係咪有着數，從下屆立法會選舉中都睇到一二。