中環出更：梁君彥幾句話擊倒「盲毛」
立法會財務委員會主席吳亮星主持會議進退失據，把新界東北發展前期工程研究撥款申請搞到一團糟。相反內務委員會主席梁君彥（Andrew）尋日同樣面對議員范國威（Gary）及毛孟靜（阿毛）展開「拉布」式追問，但佢就以幾句說話成功「KO」（擊倒）兩人，表現可謂高下立見。
范國威都冇符
內會首先討論八月份嘅以色列外訪之旅，團長方剛話合共有十二位議員報名參加，又透露屆時會有兩名創新科技署官員隨團。點知阿毛一聽到要同政府官員一齊去，即刻追問Andrew點解要矮化立法會地位喎，確係莫名其妙。Andrew於是使出一招「四両撥千斤」，叫曾經同環境局局長黃錦星一齊去過韓國訪問嘅議員何秀蘭解答問題，搞到阿毛冇聲出。
之後輪到Gary接力，佢以自己係「新議員」為由，不斷向Andrew提出規程問題，更加喺其他事項臨時提出問題，最終Andrew以一句「我已經宣布散咗會」擋駕，任憑Gary點樣大鬧，Andrew都無理佢，真係夠晒主席威嚴。
卓妮