中環出更：高球四友 寫意飯局
呢個政治氣候，從政猶如入熱廚房，唔想捱，不妨學吓班高官急流勇退。早幾日下午四點幾鐘，卓妮行經中環時，見到人稱「Ｄ姐」嘅公務員事務局前局長俞宗怡、前申訴專員黎年、工業總會前行政總裁邱達宏（Dennis）及律師葉宏德四人，在置地廣場門口等車，期間四人有傾有講，一派輕鬆。後來有架房車來到，除咗葉宏德之外，其餘三人齊齊上車離去。
卓妮見呢個組合都幾新鮮，即刻致電Dennis問清楚。Dennis笑笑口話，佢哋四個都係多年老友，亦係一齊打高爾夫球嘅波友，感情好好，不時相聚食飯，當日只係例牌飯聚，冇乜特別話題喎！咦？食晏食到四點幾鐘，唔通真係齋吹水？Dennis聽罷哈哈大笑話，係呀！因為今次聚後大家各有各忙，預計八月份先至有時間再聚，所以咪傾到難捨難離囉！
Ｄ姐黎年係同班同學
按當日所見，仍然蓄着一頭招牌短髮嘅Ｄ姐翹埋雙手企喺前排中間，大家姐風範不減。黎年就一路雙手插入褲袋，心情有幾輕鬆唔使多講。估唔到呢兩位高官離開官場後，日子真係輕鬆寫意。
話時話，點解佢哋會咁啱key呢？據聞Ｄ姐、黎年係大學同班同學，而喺貿發局工作三十多年嘅Dennis，同Ｄ姐就結緣於幾十年前嘅駐外生涯，同曾於貿易署工作嘅黎年亦因工作而相熟，眾人不時相約北上打高爾夫球。唔知下次聚舊，會唔會有未現身嘅老友加入呢？
卓妮