政情：狠批本土主義 林奮強講唔停
行政會議前成員林奮強辭退行會職務後，專注番由佢創立嘅智庫組織「黃金五十」工作，所以亦好少喺公開場合出現。不過，久休復出嘅林奮強，尋日為一個有關香港旅遊發展嘅研討會擔任主講嘉賓時，依舊講過唔停，鬧完驅蝗人士，就鬧本土主義，足足講咗超過原定嘅二十分鐘發言上限，搞到研討會主持都不耐煩寸佢，話如果畀二十年林奮強講嘢，佢都可能講唔完喎。
林奮強話，香港其中一個大問題係仇內，將客人變成仇人，社會又有咁多白色恐怖，搞到有啲港人拖篋出街都好想將「我係港人」四字刻喺額頭，擔心人哋視佢哋為個人遊旅客，所以港人必須先要改變呢種心態。
形容「傻傻哋」
佢又用「傻傻哋」三個字來形容本土主義，話香港最少有八十萬人都唔係本土人，現時最少七成長者都係外來人，所以最少七成港人都唔係本土人所生，又話如果香港只係剩番本土人，一定唔會成功喎。